ફોર્ચ્યુનર ગાડી માટે 007 નંબર લેવા 34 લાખની બોલી લગાવનારો અમદાવાદી ફરી ગયો

અમદાવાદ: હજુ દોઢ મહિના પહેલા જ ફોર્ચ્યુનર કાર માટે 007 નંબર લેવા 34 લાખ રુપિયાની બોલી લગાવનારા જેમ્સ બોન્ડના ચાહક એવા અમદાવાદના યુવક આશિક પટેલે હજુ સુધી આરટીઓમાં રુપિયા જમા ના કરાવ્યા હોવાનું સામે આવી રહ્યું છે. આશિક પટેલને સાત દિવસમાં 34 લાખ રુપિયા ભરવાના હતા, પરંતુ તેણે પેમેન્ટ ના કરતા હવે આ નંબરની ફરી હરાજી કરાઈ શકે છે. આશિક પટેલે હજુ સુધી આ રુપિયા કેમ નથી ભર્યા તેનું ચોક્કસ કારણ બહાર નથી આવી શક્યું, પરંતુ તેના વિશે જાતભાતની વાતો થઈ રહી છે.

એવું પણ જાણવા મળી રહ્યું છે કે 007 નંબર માટે આશિક અને બીજા એક શખ્સ વચ્ચે હરિફાઈ શરુ થઈ હતી, અને 25 હજાર રુપિયાથી શરુ થયેલી આ હરાજી આ બંને વચ્ચેની હુંસાતૂંસીને કારણે જ બોલીની રકમ છેક 34 લાખ રુપિયા સુધી પહોંચી ગઈ હતી. સૌથી વધુ બોલી લગાવી આશિક આ નંબર મેળવવામાં તો સફળ થયો હતો, પરંતુ જે શખ્સ સાથે આશિક આ નંબર મેળવવા હરિફાઈમાં ઉતર્યો હતો, તેની છાપ માથાભારેની છે અને તેના ડરથી આશિકે 34 લાખ જમા ના કરાવીને આ નંબર જતો કર્યો છે તેવી પણ ચર્ચા ચાલી રહી છે.

કેટલાક લોકો એવું પણ કહી રહ્યા છે કે, 34 લાખની બોલી માત્ર પબ્લિસિટી સ્ટંટ હતો. નિયમ પ્રમાણે પસંદગીનો નંબર મેળવવા 25 હજાર રુપિયા તેમજ હરાજીમાં બોલાયેલી રકમ ભરવાની રહે છે, પરંતુ જો બોલી લગાવેલી રકમ ના ભરો તો કોઈ કાર્યવાહીની જોગવાઈ નથી. બીજી તરફ, 34 લાખની બોલી લગાવતા તો લગાવી દીધી, પરંતુ ત્યારપછી માત્ર શોખ પૂરો કરવા માટે આટલા બધા રુપિયા ના ખર્ચાય તેનું ભાન થતાં આશિકે 007નો પોતાનો શોખ પડતો મૂક્યો હોવાની પણ વાતો થઈ રહી છે.

ઉલ્લેખનીય છે કે, નવેમ્બર 2020માં GJ 01 WA 007 નંબર માટે યોજાયેલી હરાજીમાં અમદાવાદ આરટીઓના ઈતિહાસમાં સૌથી વધુ 34 લાખ રુપિયાની બોલી લગાવવામાં આવી હતી. આશિક પટેલે પોતાની નવી ખરીદેલી ટોયોટા ફોર્ચ્યુનર માટે પોતાનો લકી નંબર લેવા માટે 34 લાખની બોલી લગાવતા તે એકાએક ચર્ચામાં આવી ગયો હતો. આ નંબર માટે થયેલી હરાજી અડધી રાત સુધી ચાલી હતી.

48 લાખની ગાડીનો નંબર લેવા 34 લાખ રુપિયાની બોલી લગાવનારા આશિક પટેલે તે વખતે અમારા સાથી અખબાર ટાઈમ્સ ઓફ ઈન્ડિયા સાથે વાત કરતા કહ્યું હતું કે આ નંબર તેના માટે લકી છે, અને પોતાની પહેલી કાર માટે તે આ નંબર લઈ રહ્યો છે. તેણે એવો પણ દાવો કર્યો હતો કે આ નંબર લેતા જ તેને ફાયદો પણ થયો છે. જોકે, લકી નંબરની વાતો કરનારા આશિકને કદાચ હવે આ શોખ પૂરો કરવામાં વધારે ખર્ચો થઈ જાય તેમ છે તેવું સમજાતા હવે તેણે 34 લાખ ખર્ચવાનું માંડી વાળ્યું છે.

Leave a Reply

Your email address will not be published.